വിഷമം തോന്നുമ്പോഴും മാനസിക പിരിമുറുക്കം അനുഭവപ്പെടുമ്പോഴും ചില ആളുകൾ എന്തെങ്കിലും കഴിച്ചു കൊണ്ടേ ഇരിക്കും. തങ്ങളുടെ വികാരത്തെ നിയന്ത്രിക്കാൻ ഇത്തരം ആളുകൾ ഭക്ഷണത്തെയാണ് ആശ്രയിക്കാറ്. എന്തുകൊണ്ടായിരിക്കാം ഇതെന്ന് നിങ്ങൾ ചിന്തിച്ചിട്ടുണ്ടോ? വികാരങ്ങളെ തിരിച്ചറിയാനോ അവയെ അഭിമുഖീകരിക്കാനോ ഉള്ള ബുദ്ധിമുട്ട് വൈകാരികമായ ഭക്ഷണക്രമീകരണത്തിന്റെ ശക്തമായ സൂചനയാണ്. എന്തെങ്കിലും മാനസിക അസ്വസ്ഥതകൾ അനുഭവിക്കേണ്ടിവരുമ്പോൾ അതിൽ നിന്നും ഒളിച്ചോടാൻ വേണ്ടിയാണ് മിക്ക ആളുകളും ഇത്തരത്തിൽ ആവശ്യമില്ലാതെ ഭക്ഷണം കഴിക്കുന്നത്. ശരീരം ആവശ്യപ്പെടാതെ ഇത്തരത്തിൽ ഭക്ഷണം കഴിക്കുന്നതിനെയാണ് ‘ഇമോഷനൽ ഈറ്റിങ്’ എന്ന് വിളിക്കുന്നത്. വികാരം നിയന്ത്രിക്കാനുള്ള കഴിവുകൾ ദുർബലമാകുമ്പോഴാണ് ചിലയാളുകൾ രക്ഷപ്പെടാനുള്ള മാർഗമായി ഭക്ഷണത്തെ ആശ്രയിക്കുന്നതെന്നാണ് ആരോഗ്യവിദഗ്തർ പറയുന്നത്. വിഷാദം, സമ്മർദം, കുറഞ്ഞ ഉറക്കം, ഭക്ഷണക്രമം നിയന്ത്രിക്കുന്നതിന്റെ ചരിത്രം എന്നിവക്കൊപ്പം വൈകാരികമായ ഭക്ഷണക്രമവും സാധാരണയായി പ്രത്യക്ഷപ്പെടുന്നതാണ്. ഈ ഘടകങ്ങളെല്ലാം വികാരങ്ങൾക്ക് പ്രതികരണമായി ഭക്ഷണം കഴിക്കാനുള്ള സാധ്യത വർധിപ്പിക്കുമെന്ന് ഓർമ്മിപ്പിക്കുകയാണ് ആരോഗ്യവിദഗ്തർ. വൈകാരികമായി ഭക്ഷണം കഴിക്കുന്നത് സാധാരണവും മനസ്സിലാക്കാവുന്നതുമാണ്. വികാരങ്ങളെ നേരിടാനുള്ള പ്രധാന മാർഗമായി ഇത് മാറുമ്പോഴാണ് അത് ഒരു പ്രശ്നമായി മാറുന്നത്. ഇത് നിങ്ങളുടെ ക്ഷേമത്തെയോ ദൈനംദിന ജീവിതത്തെയോ ബാധിക്കാൻ തുടങ്ങിയാൽ ഉടൻ തന്നെ ഒരു ഡോക്ടറുടെ സേവനം തേടുന്നതാണ് ഉചിതം.
