കോഴിക്കോട് മെഡിക്കല് കോളജില് അത്യാധുനിക ഓപ്പറേഷന് തീയറ്ററുകള് സജ്ജം. ഹൃദയം, കരള്, വൃക്ക എന്നീ അവയവങ്ങള് മാറ്റിവെക്കുന്നതിന് ഉള്പ്പെടെയുള്ള അത്യാധുനിക ഓപ്പറേഷന് തീയറ്ററുകളാണ് പ്രവര്ത്തനസജ്ജമാക്കിയത്. കോഴിക്കോട് മെഡിക്കല് കോളജ് സര്ജിക്കല് സൂപ്പര് സ്പെഷ്യാലിറ്റി ബ്ലോക്കിലാണ് 14 ഓപ്പറേഷന് തീയറ്ററുകള് പ്രവര്ത്തനമാരംഭിച്ചത്. കോഴിക്കോട് മെഡിക്കല് കോളജില് കരള് മാറ്റിവെക്കല് ശസ്ത്രക്രിയ യാഥാർഥ്യമാക്കാനാണ് ലക്ഷ്യമിടുന്നതെന്ന് ആരോഗ്യ വകുപ്പ് മന്ത്രി വീണ ജോര്ജ് വ്യക്തമാക്കി. നിലവില് വൃക്ക മാറ്റിവെക്കല് ശസ്ത്രക്രിയ മെഡിക്കല് കോളജില് നടക്കുന്നുണ്ട്. ഈ സര്ക്കാരിന്റെ കാലത്ത് സര്ക്കാര് മെഡിക്കല് കോളേജുകളില് കോട്ടയം മെഡിക്കല് കോളജിലും തിരുവനന്തപുരം മെഡിക്കല് കോളജിലും കരള് മാറ്റിവെക്കല് ശസ്ത്രക്രിയകള് വിജയകരമായി ആരംഭിച്ചിരുന്നു. തുടര്ന്നാണ് കോഴിക്കോട് മെഡിക്കല് കോളേജിലും കരള് മാറ്റിവെക്കല് ശസ്ത്രക്രിയക്ക് ആവശ്യമായ സജ്ജീകരണങ്ങള് സജ്ജമാക്കാന് നിര്ദേശം നല്കിയത്. ഇതിന്റെ ഭാഗമായാണ് പുതിയ ഓപ്പറേഷന് തീയറ്ററുകളില് അവയവം മാറ്റിവയ്ക്കാനുള്ള സംവിധാനങ്ങള് കൂടി ഒരുക്കിയതെന്നും മന്ത്രി വീണ ജോര്ജ് കൂട്ടിച്ചേർത്തു.
