ഒരുകാലത്ത് ഫോണ്‍ വിപണിയിലെ രാജാക്കന്മാരായിരുന്നു നോക്കിയ. ആന്‍ഡ്രോയിഡ് ഫോണുകളുടെ വരവോടെ മുട്ടുമടക്കേണ്ടി വന്ന നോക്കിയ മൈക്രോസോഫ്റ്റ് ഏറ്റെടുത്തു. പിന്നീട് നോക്കിയ എന്ന ബ്രാണ്ട് ഇല്ലാതായി പകരം മൈക്രോസോഫ്റ്റ് എന്ന പേരിലാണ് ഫോണുകള്‍ എത്തിയത്. ഇപ്പോള്‍ പ്രതാപകാലം പിടിക്കാന്‍ തിരിച്ചെത്തുകയാണ് നോക്കിയ.
കിടിലന്‍ സ്മാർട്ട്ഫോണുകളുമായാണ് നോക്കിയയുടെ രണ്ടാം വരവ്. ഫെബ്രുവരി മാസത്തിലായിരിക്കും നോക്കിയ ആന്‍ഡ്രോയ്ഡ് സ്മാര്‍ട്ട്ഫോണ്‍ ഇറങ്ങുക എന്നാണ് റിപ്പോര്‍ട്ട്. നോക്കിയ ടെക്നോളജീസ് പുതിയ ഫോണ്‍ ഇറങ്ങുന്ന കാര്യം ചൈനയിലെ നോക്കിയ പ്രസിഡന്റ് മൈക്ക് വാങ്ങ് വെളിപ്പെടുത്തിയിരുന്നു.
അടുത്തിടെ നോക്കിയ ടാബ്ലെറ്റ് ഇറക്കുന്നു എന്ന വിവരം പുറത്തുവന്നിരുന്നു. ആൻഡ്രോയിഡ് നഗൗട്ടിലായിരിക്കും ഡി വൺ സി ടാബ്ലെറ്റ് നോക്കിയ പുറത്തിറങ്ങുക എന്നായിരുന്നു അന്നത്തെ റിപ്പോര്‍ട്ട്. 13.8 ഇഞ്ചായിരിക്കും സ്ക്രീൻ വലിപ്പം. 32 ജിബി ആന്തരിക സംഭരണ ശേഷിയുള്ള ടാബിൽ 16 മെഗാപിക്സൽ പിൻകാമറയും 8 എംപി മുൻ കാമറയുമുണ്ടാകും എന്നായിരുന്നു റിപ്പോര്‍ട്ട്.
ഇത് അടക്കം മൂന്നു മുതൽ നാലു ഉൽപന്നങ്ങൾ വരെയാണ് പുതിയ ശ്രേണിയില്‍ നോക്കിയ എത്തിക്കുക എന്നാണ് റിപ്പോര്‍ട്ട്. മൈക്രോസോഫ്റ്റുമായുള്ള നോക്കിയ കരാർ ഈ വർഷം അവസാനമാണ് തീരുന്നത്. ഈ കരാർ അവസാനിച്ചാൽ വീണ്ടും സ്മാർട്ട്ഫോൺ വിപണിയിൽ തിരിച്ചെത്തുവാന്‍ നോക്കിയ തീരുമാനിച്ചിരിക്കുന്നത്. ഫിന്‍ലാന്‍റിലെ എച്ച്എംഡി ഗ്ലോബല്‍ നിര്‍മ്മിക്കുന്ന നോക്കിയയുടെ രണ്ട് ആന്‍ഡ്രോയിഡ് ഫോണുകള്‍ ഉടന്‍ വിപണിയിലേക്കെത്തുന്നത്.
നേരത്തെ പുറത്തുവന്ന റിപ്പോർട്ടുകൾ പ്രകാരം 5.2 ഇഞ്ചും 5.5 ഇഞ്ചും വലിപ്പമുള്ള ഫോണിന് 2കെ റെസല്യൂഷനാണുള്ളത്. പൊടിയില്‍ നിന്നും വെള്ളത്തില്‍ നിന്നും സംരക്ഷണം നല്‍കുന്ന ഫോണിന് ഐപി68 സെര്‍ട്ടിഫിക്കേഷനും ലഭിച്ചിട്ടുണ്ട്. സാംസങ് ഗാലക്‌സി എസ് 7 എഡ്ജിനും ഗാലക്‌സി എസ് 7 നും ഒപ്പം നില്‍ക്കുന്ന സ്മാര്‍ട്ട്‌ഫോണുകളായിരിക്കും ഇതെന്നാണ് പ്രതീക്ഷിക്കുന്നത്.
ആന്‍ഡ്രോയിഡ് 7.0 നൂഗ ആയിരിക്കും നോക്കിയയുടെ പുതിയ ഫോണില്‍ ഉപയോഗിക്കുകയെന്ന് ഗിസ്‌മോ ചൈന റിപ്പോര്‍ട്ടു ചെയ്തിരുന്നു. സ്‌നാപ്ഡ്രാഗണ്‍ 820 ചിപ് സെറ്റായിരിക്കും ഈ ഫോണുകള്‍ക്കുണ്ടാവുക. പൂര്‍ണ്ണമായും മെറ്റല്‍ ബോഡിയില്‍ ഇറങ്ങുന്ന സ്മാര്‍ട്ട് ഫോണുകളില്‍ ഫിംഗര്‍ പ്രിന്‍റ് സ്‌കാനറുകളും ഉണ്ടായിരിക്കും.
