തെരുവുനായ ആക്രമണത്തിന് പിന്നാലെ സംസ്ഥാനത്ത് കാട്ടുപന്നി ആക്രമണവും. കോഴിക്കോട് വടകരയിൽ വീട്ടമ്മയെ കാട്ടുപന്നി ആക്രമിച്ചു. വടകര ശ്രീനാരായണ ഹയർ സെക്കൻഡറി സ്കുളിന് സമീപം ചീരാം വീട്ടിൽ പീടികയ്ക്കടുത്തുള്ള കടയ്ക്കോട്ട് സൗഭാഗ്യയിൽ പത്മിനിക്കാണ് പരുക്കേറ്റത്. ഞായറാഴ്ച വൈകിട്ട് നാലോടെയായിരുന്നു സംഭവം. പത്മിനിയുടെ കൈയ്ക്കാണ് പരുക്കേറ്റത്. സ്കൂളിന് മുന്നിലെ റോഡിലൂടെ ഓടുന്നതിനിടയിൽ സ്കൂട്ടർ യാത്രക്കാരന് നേരെയും പന്നി തിരിഞ്ഞു. സ്കൂട്ടറിൽനിന്ന് വീണെങ്കിലും യാത്രക്കാരന് പരുക്കില്ല. സ്കൂളിന്റെ പരിസരത്ത് കാട്ടുപന്നിയെ കണ്ടതോടെ നാട്ടുകാർ ആശങ്കയിലാണ്.
