സംസ്ഥാനത്ത് ഹൃദയസംബന്ധമായ അടിയന്തര ചികിത്സാ സൗകര്യങ്ങൾ വർദ്ധിപ്പിച്ച് ആരോഗ്യമേഖലയിൽ വലിയൊരു മുന്നേറ്റം. 5 പുതിയ കാത്ത് ലാബുകൾക്ക് കൂടി അനുമതി നൽകിയതായി ആരോഗ്യ വകുപ്പ് മന്ത്രി വീണാ ജോർജ് അറിയിച്ചു. ഇതോടെ കേരളത്തിലെ എല്ലാ ജില്ലകളിലും സർക്കാർ മേഖലയിൽ കാത്ത് ലാബ് സൗകര്യങ്ങൾ ലഭ്യമാകും. മന്ത്രി തന്റെ ഔദ്യോഗിക ഫേസ്ബുക്ക് പേജിലൂടെയാണ് ഈ സുപ്രധാന പ്രഖ്യാപനം നടത്തിയത്.
ഇടുക്കിക്ക് പ്രത്യേക പരിഗണന:
സംസ്ഥാനത്ത് ഇതുവരെ സർക്കാർ മേഖലയിൽ കാർഡിയോളജി ചികിത്സയും കാത്ത് ലാബ് സൗകര്യവും ഇല്ലാതിരുന്ന ഏക ജില്ലയായിരുന്നു ഇടുക്കി. ഈ കുറവ് പരിഹരിച്ചുകൊണ്ട്, ഇടുക്കി മെഡിക്കൽ കോളേജിനും അടിമാലി താലൂക്ക് ആശുപത്രിയിലും പുതിയ കാത്ത് ലാബുകൾ അനുവദിച്ചിട്ടുണ്ട്. ഇടുക്കി മെഡിക്കൽ കോളേജിന് 10.3 കോടി രൂപയും, അടിമാലിക്ക് 8.94 കോടി രൂപയുമാണ് ഇതിനായി അനുവദിച്ചിട്ടുള്ളത്. ഈ നീക്കത്തിലൂടെ, സംസ്ഥാനത്തെ 14 ജില്ലകളിലും കാത്ത് ലാബ് എന്ന ലക്ഷ്യം സാക്ഷാത്ക്കരിച്ചതായി മന്ത്രി വീണാ ജോർജ് വ്യക്തമാക്കി. കാസർഗോഡും വയനാടുമാണ് ഏറ്റവും ഒടുവിൽ കാത്ത് ലാബുകൾ സ്ഥാപിച്ച മറ്റ് ജില്ലകൾ.
മറ്റ് പുതിയ കേന്ദ്രങ്ങൾ:
കോഴിക്കോട്, എറണാകുളം, ആലപ്പുഴ മെഡിക്കൽ കോളേജുകളിലാണ് പുതിയ കാത്ത് ലാബുകൾ അനുവദിക്കപ്പെട്ട മറ്റ് പ്രധാന കേന്ദ്രങ്ങൾ. കാത്ത് ലാബുകൾക്കും സിസിയുകൾക്കുമായി ഈ മൂന്ന് മെഡിക്കൽ കോളേജുകൾക്ക് 44.30 കോടി രൂപയുടെ ഭരണാനുമതി അടുത്തിടെ നൽകിയതായും മന്ത്രി അറിയിച്ചു.
