നമ്മളിൽ പലരെയും അലട്ടുന്ന പ്രശ്നമാണ് ദഹനക്കേട്. നിറഞ്ഞിരിക്കുകയാണെന്ന തോന്നലോടെ വയറിനുണ്ടാകുന്ന അസ്വസ്ഥതയാണ് ദഹനക്കേട്. പലസമയങ്ങളിലായി എല്ലാവർക്കും ഇത് അനുഭവപ്പെടാറുണ്ട്. അജീർണ്ണം എന്നും അറിയപ്പെടുന്ന ഇത് വയറ്റിലെ ദഹന നീര് സ്രവിക്കുന്നതിലെ പ്രശ്നം മൂലം ഉണ്ടാകുന്നതാണ്. യാത്രയ്ക്കിടയിലും ആഘോഷവേളകളിലും ഇത് നമ്മെ ഏറെ ബുദ്ധിമുട്ടിക്കാറുണ്ട്. ഈ പ്രശ്നം ഒഴിവാക്കാൻ ചില ലളിതമായ മാർഗങ്ങളുണ്ട് അതിൽ ഒന്നാണ് ജീരക വെള്ളം കുടിക്കുന്നത്. ദഹനക്കേട് മാറാൻ ഇത് നല്ലതാണ്. കൂടാതെ ഏലയ്ക്ക കഴിക്കുന്നതും ഗുണം ചെയ്യും. ദഹനം മെച്ചപ്പെടുത്താൻ ഏലയ്ക്കയ്ക്ക് പ്രത്യേക വൈഭവം തന്നെയുണ്ട്. ദഹനരസങ്ങളുടെ ഉത്പാദനത്തിന് ഉത്തേജനം നൽകാൻ കരയാമ്പൂവിന് കഴിവുണ്ട്. ഭക്ഷണം പാചകം ചെയ്യുമ്പോൾ വെളുത്തുള്ളി ഉപയോഗിക്കുന്നത് ഗുണകരമാണ്. ദഹനരസം വേഗത്തിൽ ഉത്പാദിപ്പിക്കാൻ വെളുത്തുള്ളിക്ക് കഴിയും. ഇഞ്ചി ഉപയോഗിക്കുന്നത് ദഹനസംബന്ധമായ രോഗങ്ങൾക്ക് അത്യുത്തമമാണ്. വയറുകടി, വയറുവേദന എന്നിവ വേഗം മാറാൻ ഇഞ്ചി ഉപകരിക്കും.
