കോഴിക്കോട് : സന്തോഷ് ട്രോഫി ദക്ഷിണ മേഖലാ യോഗ്യതാ മത്സരത്തില്‍ കേരളത്തിന് തുടര്‍ച്ചയായ രണ്ടാം ജയം. രണ്ടാം മത്സരത്തിലെ രണ്ടാം മിനുട്ടില്‍ തന്നെ മുന്നേറ്റം തുടങ്ങിയ കേരളം മടക്കമില്ലാത്ത മൂന്ന് ഗോളിനാണ് ആന്ധ്രയെ തോല്‍പ്പിച്ചത്. വിജയത്തോടെ ഫൈനല്‍ റൗണ്ട് സാധ്യതകള്‍ സജീവമാക്കിയ കേരളത്തിന് കര്‍ണ്ണാടകവുമായാണ് അടുത്ത മത്സരം.
ആദ്യ പകുതിയിലായിരുന്നു മൂന്നു ഗോളുകളും. രണ്ടാം മിനുട്ടില്‍ ഉസ്മാനാണ് കേരളത്തിനായി ആദ്യം വല കുലുക്കിയത്. തുടര്‍ന്ന് 22 മത് മിനിട്ട് പിന്നിട്ടപ്പോള്‍ സഹല്‍ അബ്ദു സമദും 28 മത് മിനിട്ടില്‍ ലഭിച്ച ഫ്രീകിക്ക് ഫെഡ് ചെയ്ത് ഡിഫന്‍ഡര്‍ ലിജോ വല കുലുക്കി. രണ്ടാം പകുതിയില്‍ കേരളത്തിന് അനുകൂലമായി പെനാല്‍റ്റി ലഭിച്ചുവെങ്കിലും ജോബി ജസ്റ്റിന്റെ കിക്ക് പുറത്തുപോയതോടെ കേരളത്തിന്റെ വിജയം മൂന്ന് ഗോളില്‍ ഒതുങ്ങി.
