നോർക്ക റൂട്ട്‌സ് യു.കെ റിക്രൂട്ട്‌മെന്റ് ഡ്രൈവിൽ 297 നഴ്‌സുമാർ തെരഞ്ഞെടുക്കപ്പെട്ടു. ഒക്ടോബർ 10 മുതൽ 21 വരെ വിവിധ തീയതികളിലായി കൊച്ചിയിലും മംഗളൂരുവിലുമായി നടന്ന റിക്രൂട്ട്‌മെന്റിലാണ് 297 നഴ്‌സുമാർ രഞ്ഞെടുക്കപ്പെട്ടത്. ഇവരിൽ 86 പേർ OET യു.കെ സ്‌കോർ നേടിയവരാണ്. യു.കെയിൽ നിന്നുളള അഞ്ചംഗ പ്രതിനിധി സംഘമാണ് അഭിമുഖങ്ങൾക്ക് നേതൃത്വം നൽകിയത്. പ്രസ്തുത റിക്രൂട്ട്‌മെന്റിൽ പങ്കെടുക്കാൻ കഴിയാത്തവർക്കും നേരത്തേ അപേക്ഷ നൽകിയവർക്കും അവസരമുണ്ട്. യുകെ കരിയർ ഫെയർ മൂന്നാം ഘട്ടം നവംബർ ആറ് മുതൽ പത്തു വരെ കൊച്ചിയിൽ നടക്കമെന്നു നോർക്ക റൂട്സ് അധികൃതർ അറിയിച്ചു. OET / IELTS- UK SCORE നേടിയ വിവിധ സ്‌പെഷ്യാലിറ്റികളിലേയ്ക്കുളള ഡോക്ടർമാർ, നഴ്‌സുമാർ, സോണോഗ്രാഫർമാർ എന്നിവർക്കാണ് അവസരമുളളത്.
