സ്ത്രീകള് പൊതുവേദിയില് ഇറങ്ങുന്നത് വലിയ നാശമുണ്ടാക്കുമെന്ന വിവാദ പരാമര്ശത്തില് വലിയ ചര്ച്ചകളും പ്രതികരണങ്ങളും ഉണ്ടായ സാഹചര്യത്തില് പ്രതികരിച്ച് കാന്തപുരം എപി അബൂബക്കര് മുസ്ലിയാര്. ആത്മീയ ചര്ച്ചകളെ ബോധപൂര്വ്വം വിവാദങ്ങളിലേക്കും വിഭാഗീയതകളിലേക്കും തിരിച്ചുവിടാനുള്ള ശ്രമമാണ് നടക്കുന്നതെന്ന് അദ്ദേഹം ഫെയ്സ്ബുക്കിലൂടെ പ്രതകരിച്ചു.
കാന്തപുരത്തിന്റെ ഫെയ്സ്ബുക്ക് പോസ്റ്റിന്റെ പൂര്ണരൂപം
സംവാദങ്ങള് ആശയങ്ങളെ നിഷ്പക്ഷമായി വിലയിരുത്താനും പുതിയ കാര്യങ്ങള് പഠിക്കാനുമുള്ള ആരോഗ്യകരമായ വേദികളാകണം. അതേസമയം, ഇത്തരം ആത്മീയ ചര്ച്ചകളെ ബോധപൂര്വ്വം വിവാദങ്ങളിലേക്കും വിഭാഗീയതയിലേക്കും വഴിതിരിച്ചുവിടാന് ശ്രമിക്കുന്നവരുടെ നിക്ഷിപ്ത താത്പര്യങ്ങള് നാം കൃത്യമായി തിരിച്ചറിയുകയും വേണം. അറിവന്വേഷണങ്ങളെ അട്ടിമറിച്ച്, സമൂഹത്തില് ഭിന്നത വളര്ത്താനുള്ള ഇത്തരം ദുഷ്ടലാക്കുകളെ തികഞ്ഞ ജാഗ്രതയോടെ വേണം നാം സമീപിക്കാന്.
പ്രവര്ത്തകര് യാതൊരുവിധ പ്രകോപനങ്ങള്ക്കും വശംവദരാകാന് പാടില്ല. ഇത്തരം സാഹചര്യങ്ങളില് ഒട്ടും വൈകാരികമായി പ്രതികരിക്കാതെ, തികഞ്ഞ പക്വതയോടെയും വിവേകത്തോടെയും മാത്രമേ നാം ഇടപെടാവൂ. നാളിതുവരെയും ഏതു തിന്മകളെയും നന്മ കൊണ്ടു മാത്രം എതിരിട്ട സംസ്കാരമാണ് പാരമ്പര്യ സുന്നി വിശ്വാസികളുടേത്. നമ്മുടെ അടിസ്ഥാന ലക്ഷ്യങ്ങളില് നിന്ന് വ്യതിചലിക്കാതെ, അച്ചടക്കത്തോടെയും സംയമനത്തോടെയും മുന്നോട്ടു പോകണം. അല്ലാഹു എല്ലാവര്ക്കും നന്മകള്ക്കു തൗഫീഖ് നല്കട്ടെ
