ഉയർന്ന അളവിൽ മധുരം കഴിക്കുന്നത് ഹൃദയത്തിന് പണിതരും.
ബിഎംസി മെഡിസിൻ എന്ന ജേർണലിലാണ് ഇതുസംബന്ധിച്ച പഠനം പ്രസിദ്ധീകരിച്ചിരിക്കുന്നത്. ഉയർന്ന അളവിലുള്ള മധുരം, പ്രത്യേകിച്ച് ഭക്ഷണങ്ങളിലും പാനീയങ്ങളിലും ചേർക്കുന്ന ഫ്രീ ഷുഗർ എന്നറിയപ്പെടുന്ന മധുരം ഹൃദ്രോഗസാധ്യതയും പക്ഷാഘാതസാധ്യതയും വർധിപ്പിക്കുമെന്ന് പഠനത്തിൽ ചൂണ്ടിക്കാട്ടുന്നു. ഒമ്പതുവർഷത്തോളം മുപ്പത്തിയേഴിനും എഴുപത്തിമൂന്നിനും ഇടയിൽ പ്രായമുള്ള 110,000 യു.കെ. സ്വദേശികളുടെ ആരാേഗ്യവിവരങ്ങൾ ശേഖരിച്ച് നടത്തിയ പഠനത്തിനൊടുവിലാണ് വിലയിരുത്തലിലെത്തിയത്.
ഫ്രീ ഷുഗറിന്റെ അളവ് ഓരോ അഞ്ച് ശതമാനവും വർധിക്കുകവഴി ഹൃദ്രോഗസാധ്യത ആറുശതമാനവും പക്ഷാഘാതസാധ്യത പത്തുശതമാനവും വർധിക്കുന്നതായി ഗവേഷകർ കണ്ടെത്തി. അതേസമയം പഴങ്ങളിലും പച്ചക്കറികളിലും സ്വാഭാവികമായി കാണപ്പെടുന്ന മധുരത്തെ ഇക്കൂട്ടത്തിൽ ഉൾപ്പെടുത്തിയിട്ടില്ല. അമിതമായി മധുരം കഴിക്കുന്നത് കരളിന് ഇരട്ടിഭാരം നൽകും. കരളിൽ കൊഴുപ്പടിയുന്ന ഫാറ്റി ലിവർ എന്ന അവസ്ഥയ്ക്കും ഇതുവഴി ഡയബറ്റിസിനും ഹൃദ്രോഗങ്ങൾക്കും കാരണമാകുംഎന്നും ഗവേഷകർ പഠനത്തിൽ കൂട്ടിച്ചേർത്തു.
