തമിഴ് നടൻ ഡാനിയൽ ബാലാജി ഹൃദയാഘാതം മൂലം അന്തരിച്ചു. 48 വയസ്സായിരുന്നു. നെഞ്ചുവേദനയെ തുടർന്ന് ചെന്നൈ കൊട്ടിവാകത്തെ ആശുപത്രിയിൽ പ്രവേശിപ്പിച്ചെങ്കിലും, വെള്ളിയാഴ്ച രാത്രിയോടെ മരണം സ്ഥിരീകരിച്ചു. ടെലിവിഷൻ സീരിയലിലൂടെയാണ് ഡാനിയൽ ബാലാജി അഭിനയ രംഗത്തേക്ക് പ്രവേശിക്കുന്നത്. കമൽ ഹാസന്റെ ‘മരുതനായക’ത്തിൽ യൂണിറ്റ് പ്രൊഡക്ഷൻ മാനേജറായാണ് സിനിമാ ലോകത്തേക്ക് ചുവടുവെക്കുന്നത്. തമിഴിന് പുറമെ മലയാളം, കന്നഡ ഭാഷകളിലെയും സിനിമകളിൽ സജ്ജീവമായിരുന്നു. വേട്ടയാട് വിളയാട്, വട ചെന്നൈ, മായവൻ, ഭെെരവ തുടങ്ങിയവയാണ് ശ്രദ്ധേയമായ തമിഴ് ചിത്രങ്ങൾ. ബ്ലാക്ക്, ഭഗവാൻ, ഡാഡി കൂൾ എന്നീ മലയാള ചിത്രങ്ങളിലും ഡാനിയൽ ബാലാജി ശ്രദ്ധനേടി. മരണത്തിൽ സിനിമാലോകത്തെ നിരവധി പേർ അനുശോചനമറിയിച്ചു. സംസ്കാര ചടങ്ങുകൾ ശനിയാഴ്ച നടൻ്റെ വസതിയിൽ നടത്തപ്പെടും.
