സ്തനാര്‍ബുദ ബോധവത്കരണ മാസാചരണത്തിന്റെ ഭാഗമായി ഇന്ന് കേരളത്തിലെ 42 ആശുപത്രികളില്‍ സ്തനാര്‍ബുദ രോഗികള്‍ക്ക് ശസ്ത്രക്രിയ നടത്തും. സര്‍ക്കാര്‍-സ്വകാര്യ ആശുപത്രി ഭേദമെന്യേ വിവിധ ആശുപത്രികളെ സംയോജിപ്പിച്ചു കൊണ്ട് അസോസിയേഷന്‍ ഓഫ് സര്‍ജന്‍സ് കേരളാ ചാപ്റ്ററാണ് ബ്രെസ്റ്റത്തോണ്‍ 2023 എന്ന പേരില്‍ പരിപാടി സംഘടിപ്പിക്കുന്നത്. തിരഞ്ഞെടുത്ത എല്ലാ ആശുപത്രികളും ഇന്നുമുതല്‍ എല്ലാ ശനിയാഴ്ചകളിലും സ്തനാര്‍ബുദ രോഗികള്‍ക്കായി പ്രത്യേകം ചികിത്സയൊരുക്കും. കൂടാതെ സംസ്ഥാനത്തെ എല്ലാ ശസ്ത്രക്രിയാ കേന്ദ്രങ്ങളിലും സ്തനാര്‍ബുദ ബോധവല്‍ക്കരണ ക്ലാസുകളും പരിപാടികളും സംഘടിപ്പിക്കും. പൊതുജനങ്ങള്‍ക്ക് മുന്‍കൂട്ടിയുള്ള രോഗനിര്‍ണയവും, ശസ്ത്രക്രിയയുടെ പ്രാധാന്യവും, സ്തനാര്‍ബുദ അവബോധവും സൃഷ്ടിക്കുക എന്നതാണ് എ എസ് ഐ കേരള-പരിപാടിയിലൂടെ ലക്ഷ്യമിടുന്നതെന്ന് കേരളാ ചാപ്റ്റര്‍ സെക്രട്ടറി ഡോ മധു മുരളി വ്യക്തമാക്കി.
