തിരുവനന്തപുരം : ചാനലില്‍ കാണുന്നതൊന്നും പ്രവര്‍ത്തകര്‍ ഗൗരവമാക്കേണ്ടതില്ലെന്നും അതൊക്കെ മൈക്ക് കാണുമ്പോഴുള്ള ആവേശത്തില്‍ ചിലര്‍ അറിയാതെ പറഞ്ഞുപോകുന്നതാണെന്നും പ്രതിപക്ഷ നേതാവ് രമേശ് ചെന്നിത്തല. കോണ്‍ഗ്രസ് ഒറ്റക്കെട്ടാണെന്നും പ്രതിപക്ഷ സമരങ്ങള്‍ കൂടുതല്‍ തീക്ഷ്ണമാക്കണമെന്ന നിര്‍ദേശത്തെ സ്വാഗതം ചെയ്യുന്നുവെന്ന് പറഞ്ഞ ചെന്നിത്തല, കെ.കരുണാകരനും എ.കെ ആന്റണിയും പ്രതിക്ഷ നേതാക്കളായിരുന്നപ്പോഴും ആദ്യ ആറുമാസം തീവ്രമായ സമരങ്ങള്‍ നടത്തിയിരുന്നില്ലെന്നും വ്യക്തമാക്കി.
പ്രതിപക്ഷ സമരങ്ങള്‍ കൂടുതല്‍ ശക്തിപ്പെടുത്താതിരുന്നതിലൂടെ പുതിയ സര്‍ക്കാരിന് താന്‍ ആറ് മാസം സമയം അുനവദിക്കുകയായിരുന്നു എന്നും അധികാരത്തില്‍ നിന്ന് ഇറങ്ങിയ ദിവസം മുതല്‍ സമരം ചെയ്തിരുന്നെങ്കില്‍ പുതിയ സര്‍ക്കാരിനെ ഒന്ന് ഭരിക്കാന്‍ അനുവദിക്കൂ എന്ന് ജനം പറഞ്ഞേനേ എന്നും ചെന്നിത്തല കൂട്ടിച്ചേര്‍ത്തു.
