ഇന്ത്യയിൽ മദ്യപാനം മൂലമുള്ള കാൻസറുകൾ വർധിച്ച് വരുന്നതായി ആരോഗ്യവിദഗ്ധരുടെ മുന്നറിയിപ്പ്. മദ്യപാനം കാൻസറിനുള്ള സാധ്യത വർധിപ്പിക്കുന്നുവെന്നാണ് വിദഗ്ദർ വ്യക്തമാക്കുന്നത്. കൂടാതെ 20-ലധികം തരം കാൻസറുകൾക്ക് മദ്യത്തിന്റെ ഉപയോഗം കാരണമാകുന്നു. മദ്യപാനം വായ, തൊണ്ട, അന്നനാളം, ആമാശയം, വൻകുടൽ, മലാശയം, പാൻക്രിയാസ് തുടങ്ങിയവയുമായി ബന്ധപ്പെട്ട കാൻസറുകൾക്കുള്ള സാധ്യത വർധിപ്പിക്കുന്നതായി വാസ്കുലർ ഇന്റർവെൻഷണൽ റേഡിയോളജിസ്റ്റും എൻഡോവാസ്കുലർ സർജനുമായ ഡോ. പുനീത് ഗാർഗ് ഐഎഎൻഎസിനോട് വ്യക്തമാക്കി. സ്ത്രീകളിൽ സ്തനാർബുദത്തിനും പുരുഷന്മാരിൽ പ്രോസ്റ്റേറ്റ് കാൻസറിനും മദ്യപാനം കാരണമാക്കും. ലോകാരോഗ്യ സംഘടനയുടെ കണക്കനുസരിച്ച് ലോകമെമ്പാടുമുള്ള കാൻസർ രോഗികളിൽ ഏകദേശം നാല് ശതമാനവും മദ്യപാനം കാരണമാണ്. 2020-ൽ ഇന്ത്യയിൽ ഏകദേശം 62,100 പുതിയ കാൻസർ രോഗികൾ ഉണ്ടാകാൻ മദ്യപാനം കാരണമായെന്ന് ലാൻസെറ്റ് ജേണലിൽ പ്രസിദ്ധീകരിച്ച ഒരു സമീപകാല പഠനം ചൂണ്ടിക്കാട്ടി. ദീർഘകാല മദ്യപാനം രോഗപ്രതിരോധ സംവിധാനത്തെ ദുർബലപ്പെടുത്തുകയും കാൻസർ കോശങ്ങളെ തിരിച്ചറിയാനും നശിപ്പിക്കാനുമുള്ള കഴിവ് കുറയ്ക്കുകയും ചെയ്യുന്നുവെന്ന് വിദഗ്ധർ വ്യക്തമാക്കി.
