കൊച്ചി കലൂർ സ്റ്റേഡിയത്തിലെ വിഐപി ഗാലറിയിൽ നിന്ന് വീണ് പരിക്കേറ്റ് ചികിത്സയിൽ കഴിയുന്ന ഉമാ തോമസ് എംഎൽഎ ആരോഗ്യം വീണ്ടെടുത്തതായി ആശുപത്രി വൃത്തങ്ങൾ വ്യക്തമാക്കി. വളരെ മോശം അവസ്ഥയിലായിരുന്നു എംഎൽഎ ആശുപത്രിയിൽ എത്തിയതെന്ന് ആശുപത്രി മെഡിക്കൽ ഡയറക്ടർ ഡോ. കൃഷ്ണനുണ്ണി പോളക്കുളത്ത് ചൂണ്ടിക്കാട്ടി. അവിടെ നിന്ന് ഒരു ടീം വർക്കിന്റ ഭാഗമായാണ് ഇവിടം വരെ എത്താൻ സാധിച്ചത്. വേഗത്തിൽ ആരോഗ്യം വീണ്ടെടുക്കുന്നുണ്ടെന്നും കുറച്ചു ദിവസം കൂടി ആശുപത്രിയിൽ കഴിയേണ്ടി വരും എന്ന് ഡോക്ടർ കൂട്ടിച്ചേർത്തു. ആശുപത്രിയിൽ ഓഫീസ് സൗകര്യം ഒരുക്കാനാണ് തീരുമാനം. എംഎൽഎയുടെ മനോധൈര്യം പ്രശംസനീയമാണെന്നും ഡോക്ടർ അഭിപ്രായപ്പെട്ടു. വെന്റിലേറ്ററിൽ നിന്ന് മാറ്റി രണ്ട് ദിവസം കഴിഞ്ഞപ്പോൾ തന്നെ അയാം ഓകെ എന്ന് ഉമ തോമസ് പറഞ്ഞു. അപകടത്തിന്റെ ദൃശ്യം എംഎൽഎയെ കാണിച്ചിരുന്നു എന്നും അത് കണ്ടതിന് ശേഷം വീട്ടിൽ പോകണം എന്ന് പറഞ്ഞിട്ടില്ലെന്നും ഡോക്ടർ കൃഷ്ണനുണ്ണി വ്യക്തമാക്കി.
