വിവാഹം കഴിക്കുന്നവരില്‍ രക്തസമ്മര്‍ദ്ദം വര്‍ധിക്കുന്നതായി പഠന റിപ്പോര്‍ട്ട്. ചൈന, ഇംഗ്ലണ്ട്, ഇന്ത്യ, യുണൈറ്റഡ് സ്റ്റേറ്റ്‌സ് എന്നിവിടങ്ങളില്‍ നടത്തിയ ഗവേഷണത്തിലാണ് പുതിയ കണ്ടെത്തല്‍. അമേരിക്കന്‍ ഹാര്‍ട്ട് അസോസിയേഷന്റെ ജേണലില്‍ ആണ് പഠനം പ്രസിദ്ധീകരച്ചത്. നാല് രാജ്യങ്ങളിലായി 30,000 ദമ്പതികളില്‍ നിന്നുള്ള വിവരങ്ങള്‍ ശേഖരിച്ചായിരുന്നു പഠനം. മിഷിഗണ്‍ യൂണിവേഴ്‌സിറ്റി, എമോറി യൂണിവേഴ്‌സിറ്റി, കൊളംബിയ യൂണിവേഴ്‌സിറ്റി എന്നിവിടങ്ങളില്‍ നിന്നുള്ള ഗവേഷകരാണ് പഠനത്തിന് പിന്നില്‍. ഉയര്‍ന്ന രക്തസമ്മര്‍ദ്ദമുള്ള പുരുഷന്മാരെ വിവാഹം കഴിച്ച സ്ത്രീകള്‍ക്ക് ഹൈപ്പര്‍ടെന്‍ഷന്‍ ഉണ്ടാകാനുള്ള സാധ്യത കൂടുതലാണെന്ന് പഠനം സൂചിപ്പിക്കുന്നു. നേരെ തിരിച്ചും, ഹൈപ്പര്‍ ടെന്‍ഷന്‍ ഉള്ള സ്ത്രീകളെ വിവാഹം കഴിച്ച പുരുഷന്മാരുടെ അവസ്ഥയും ഇതുതന്നെ. ഇംഗ്ലണ്ടിലെ 47.1% ദമ്പതികളും യുണൈറ്റഡ് സ്റ്റേറ്റ്‌സില്‍ 37.9% ഉം ചൈനയില്‍ 20.8% ഉം ഇന്ത്യയില്‍ 19.8% ഉം ഈ അവസ്ഥ നേരിടുന്നുണ്ട്. ദമ്പതികളുടെ രക്തസമ്മര്‍ദ്ദ നില തമ്മിലുള്ള ബന്ധം യുഎസിലും ഇംഗ്ലണ്ടിലും ഉള്ളതിനേക്കാള്‍ ചൈനയിലും ഇന്ത്യയിലും ശക്തമാണെന്ന് പഠനം കണ്ടെത്തി. രാജ്യത്തെ സംസ്‌കാരങ്ങളിലുള്ള വ്യത്യാസമാണ് ഇതിന് കാരമെന്നാണ് പഠനം പറയുന്നത്.
