യുകെയിൽ ചെവി വേദനയുമായി ആശുപത്രിയിലെത്തിയ യുവതിയുടെ ചെവിക്കുള്ളിൽ എട്ടുകാലി വലയും കൂടും കണ്ടെത്തി. അധ്യാപികയും കണ്ടൻറ് ക്രിയേറ്ററുമായ ലൂസി വൈൽഡ് എന്ന യുവതിക്കാണ് വിചിത്രമായ അനുഭവമുണ്ടായത്. യുവതിക്ക് ആഴ്ചകളായി ചെവിക്കുള്ളിൽ അസ്വസ്ഥതയും ചെറിയ വേദനയും ഉണ്ടായിരുന്നു. ദിവസങ്ങൾ കൂടുംതോറും ചെവിക്കുള്ളിൽ വേദനയും കൂടിവന്നു. തുടർന്ന് ഒലിവ് ഓയിൽ ഒഴിച്ചതോടെ എട്ടുകാലി പുറത്തുവന്നു. ചെവിയിൽ നിന്ന് രക്തം വരികയും കടുത്ത വേദന അനുഭവപ്പെടുകയും ചെയ്തതോടെ ഇവർ ആശുപത്രിയിൽ പ്രവേശിക്കുകയായിരുന്നു. തുടർന്ന് നടത്തിയ പരിശോധനയിൽ എട്ടുകാലി ചെവിക്കുള്ളിൽ കയറിക്കൂടുക മാത്രമല്ല, അകത്ത് വല നെയ്ത് കെട്ടി താമസമാക്കുകയും കൂടി ചെയ്തതായി കണ്ടെത്തി. എട്ടുകാലി പുറത്തെത്തിയെങ്കിലും ദിവസങ്ങളോളം അത് അകത്ത് ജീവനോടെ കഴിഞ്ഞത്, ചെവിക്കുള്ളിൽ അണുബാധ ഉണ്ടാക്കിയെന്നും യുവതിയുടെ കേൾവിശക്തിയെ ഇത് ബാധിച്ചിട്ടുണ്ടെന്നു ഡോക്ടർമാർ വ്യക്തമാക്കി. എന്നാൽ എങ്ങനെയാണ് ചെവിക്കുള്ളിൽ എട്ടുകാലി കയറിയതെന്ന് തനിക്കറിയില്ലെന്നാണ് ലൂസി പ്രതികരിച്ചത്.
