പയ്യന്നൂര്‍ നഗരസഭാപരിധിയിലെ കോറോം വില്ലേജിലെ രണ്ടുപേര്‍ക്ക് അപൂര്‍വരോഗമായ മെലിയോയിഡോസിസ് സ്ഥിരീകരിച്ചതിനു പിന്നാലെ കോറോത്ത് മൂന്നു പേരില്‍ക്കൂടി രോഗലക്ഷണങ്ങള്‍ കണ്ടെത്തി. ഇവരില്‍നിന്നുള്ള സാമ്പിള്‍ കണ്ണൂര്‍ ഗവ. മെഡിക്കല്‍ കോളേജ് ആശുപത്രി ലാബിലേക്ക് പരിശോധനയ്ക്ക് അയച്ചു. ഒരാഴ്ചയോളമെടുക്കും പരിശോധനാഫലമറിയാന്‍. രോഗലക്ഷണമുള്ളവരെ പരിശോധനയ്ക്ക് വിധേയരാക്കണമെന്ന് ആരോഗ്യവകുപ്പ് നിര്‍ദേശം നല്‍കിയിട്ടുണ്ട്. സമീപത്തുള്ള കുളത്തില്‍ നിന്നാകാം രോഗകാരിയായ ബാക്ടീരിയ രണ്ടുപേരിലും എത്തിയത് എന്നാണ് ആരോഗ്യവകുപ്പിന്റെ കണ്ടെത്തല്‍. ഇവര്‍ സ്ഥിരമായി കുളിക്കാറുണ്ടായിരുന്ന കുളം ഉപയോഗിക്കുന്നതിന് വിലക്ക് ഏര്‍പ്പെടുത്തിയിട്ടുണ്ട്. കുളത്തിലെ വെള്ളവും പരിശോധനക്കയച്ചു.
