ആരോഗ്യനില മേശമായതിനെ തുടര്‍ന്ന് ആശുപത്രിയില്‍ പ്രവേശിപ്പിക്കപ്പെട്ട മുന്‍ ഇന്ത്യന്‍ ക്രിക്കറ്റര്‍ വിനോദ് കാംബ്ലിയുടെ ആരോഗ്യനിലയില്‍ പുരോഗതി എന്ന് റിപ്പോർട്ട്. മുംബൈയിലെ സ്വകാര്യ ആശുപത്രിയിലെ ഡോക്റ്റര്‍മാരാണ് ഇക്കാര്യം വ്യക്തമാക്കിയത്. കഴിഞ്ഞ ദിവസം ആശുപത്രിയില്‍ പ്രവേശിപ്പിച്ച താരത്തിന്റെ മസ്തിഷ്‌കത്തില്‍ രക്തം കട്ടപിടിച്ചതായി പരിശോധനയില്‍ കണ്ടെത്തിയിരുന്നു. അണുബാധയെ തുടര്‍ന്ന് ആശുപത്രിയിലെത്തിയ കാംബ്ലിക്ക് ഒരു മാസത്തിലേറെ ആശുപത്രിയില്‍ കഴിയേണ്ടിവരും. ആശുപത്രിയിലുള്ള വിനോദ് കാംബ്ലിയുടെ ആദ്യ പ്രതികരണവും അതിനിടെ പുറത്തുവന്നു. ഡോക്ടര്‍മാര്‍ കാരണമാണു ഞാനിപ്പോള്‍ ജീവനോടെ ഉള്ളതെന്ന് കാംബ്ലി പറയുന്നത് വീഡിയോയില്‍ കാണാം. അവര്‍ പറയുന്ന കാര്യങ്ങളൊക്കെ ഇപ്പോള്‍ ചെയ്യുന്നുണ്ടെന്നും വേദനയൊന്നും ഇല്ലെന്നും കാംബ്ലി വ്യക്തമാക്കി. കാംബ്ലിയെ ആശുപത്രിയിലെത്തിച്ചപ്പോള്‍ അദ്ദേഹത്തിന് ഇരിക്കാനോ, നടക്കാനോ സാധിച്ചിരുന്നില്ലെന്നു ഡോക്ടര്‍മാര്‍ പ്രതികരിച്ചു.
