ഉറക്കത്തിൽ നിന്ന് വൈകി ഉണരുന്നതാണ് ആരോഗ്യത്തിന് നല്ലതെന്ന് പുതിയ പഠന റിപ്പോർട്ട്. ലണ്ടനിലെ ഇംപീരിയൽ കോളേജ് നടത്തിയ ഗവേഷണത്തിലാണ് കണ്ടെത്തിയത്. 26,000 ആളുകളിലാണ് ഈ പഠനം നടത്തിയത്. ന്യൂറോസയൻസ് ജേണലിലാണ് പഠനം പ്രസിദ്ധീകരിച്ചിരിക്കുന്നത്. പഠനമനുസരിച്ച് വൈകുന്നേരങ്ങളിൽ സജീവമാകുന്നവർ അഥവാ ‘നൈറ്റ് ഔൾസ്’ രാവിലെ നേരത്തേ ഉണരുന്നവരെക്കാൾ മിടുക്കരായിരിക്കും. മാത്രമല്ല വൈകി ഉണരുന്നവർ ബുദ്ധി, യുക്തി, ഓർമ്മശക്തി തുടങ്ങിയവയിലും മറ്റുള്ളവരെ അപേക്ഷിച്ച് മുൻപന്തിയിലായിരിക്കും. ഏഴു മുതൽ ഒൻപതു മണിക്കൂർ വരെ രാത്രി ഉറങ്ങണം. തടസ്സമില്ലാതെ സുഖമായി ഉറങ്ങിയാൽ മാത്രമേ അത് ആരോഗ്യകരമായ ഉറക്കമാകൂ. സമയം കൂടുതലോ കുറവോ ആണ് ഉറക്കമെങ്കിൽ ഇത് തലച്ചോറിനും ഓർമ്മശക്തിക്കും ദോഷകരമാകും.
