സർജറി കൂടാതെ ക്യാൻസർ കോശങ്ങളെ നശിപ്പിക്കുന്നതിനുള്ള സംവിധാനം കണ്ടെത്തി അമേരിക്കയിൽ നിന്നുള്ള ഗവേഷകസംഘം. ‘അമിനോസയാനിൻ മോളിക്യൂൾസ്’ എന്ന തന്മാത്രകളെ ഉപയോഗിച്ച് ക്യാൻസർ കോശങ്ങളെ അതിവേഗം നശിപ്പിക്കുകയെന്നതണ് ഈ പുതിയ കണ്ടെത്തൽ. മുമ്പും തന്മാത്രകളുപയോഗിച്ച് ക്യാൻസർ കോശങ്ങളെ ഇല്ലാതാക്കുന്ന രീതി ഗവേഷകർ വികസിപ്പിച്ചിട്ടുള്ളതാണ്. ലക്ഷക്കണക്കിന് മടങ്ങ് വേഗതയാണ് പുതിയ രീതിക്കുള്ളതെന്നാണ് ഗവേഷകർ പറയുന്നത്. ഇൻഫ്രാറെഡ് കിരണങ്ങളുടെ സഹായത്തോടെ തന്മാത്രകളെ ശക്തിയായി ഇളക്കും. ഈ തന്മാത്രകൾ ക്യാൻസർ കോശങ്ങളെ പിടിച്ച് അവയെ തകർത്ത് മുന്നേറാനും സാധിക്കും. ലാബിലെ പരീക്ഷണത്തിൽ 99 ശതമാനമാണ് ക്യാൻസർ കോശങ്ങളെ ഇല്ലാതാക്കുന്നതിന് ഈ മോളിക്യുലാർ മെഷീൻ സഹായിച്ചത് എന്ന് ഗവേഷകർ അഭിപ്രായപ്പെടുന്നു. വിപ്ലവാത്മകമായ തുടക്കമാണിതെന്നാണ് വിദഗ്ധർ അവകാശപ്പെടുന്നത്. ഭാവിയിൽ ക്യാൻസർ ചികിത്സാമേഖലയിൽ വമ്പൻ തരംഗം സൃഷ്ടിക്കാൻ തക്ക സ്ഫോടനാത്മകത ഈ കണ്ടെത്തലിനുണ്ട്. എന്നിരുന്നാലും കൂടുതൽ ഗവേഷണങ്ങൾ നടത്തേണ്ടതുണ്ടെന്നു ഗവേഷകർ ചൂടികാട്ടുന്നു.
