കോഴിക്കോട്: പാമ്പാടി നെഹ്റു കോളേജില്‍ മരിച്ച ജിഷ്ണു പ്രണോയുടെ വീട്ടില്‍ ഭരണപരിഷ്‌കാര കമ്മിഷന്‍ ചെയര്‍മാനും മുതിര്‍ന്ന കമ്മ്യൂണിസ്റ്റ് നേതാവുമായ വി.എസ് അച്യുതാനന്ദന്‍ ഇന്ന് സന്ദര്‍ശനം നടത്തും. രാവിലെ 11 മണിയോടെയാണ് വി.എസ് ജിഷ്ണുവിന്റെ നാദാപുരം വളയത്തെ വസതിയില്‍ എത്തുക.
ജിഷ്ണുവിന്റെ മരണത്തില്‍ കുറ്റക്കാരായ പ്രതികള്‍ പോലീസിന്റെ മൂക്കിന്‍ തുമ്പത്തുനിന്ന് ഒളിവില്‍പ്പോയതില്‍ ജിഷ്ണുവിന്റെ കുടുംബം കടുത്ത പ്രതിഷേധം രേഖപ്പെടുത്തിയതിന് ഇടയിലാണ് വി.എസിന്റെ സന്ദര്‍ശനം. നെഹ്റു കോളജ് ചെയര്‍മാന്‍ കൃഷ്ണദാസടക്കം മൂന്ന് പേര്‍ക്കെതിരെ ആത്മഹത്യാ പ്രേരണക്കുറ്റം ചുമത്തിയാണ് പോലീസ് കേസെടുത്തിരുന്നത്. അന്വേഷണം നീളുകയാണെങ്കില്‍ പി.കെ കൃഷ്ണദാസിന്റെ വസതിക്ക് മുന്നില്‍ സത്യാഗ്രഹസമരം നടത്തുമെന്ന് ജിഷ്ണുവിന്റെ അമ്മ അറിയിച്ചിരുന്നു. ഇതിന് പിന്നാലെയുള്ള വി.എസിന്റെ സന്ദര്‍ശനം പ്രതീക്ഷയോടെയാണ് കുടുംബം കാണുന്നത്.
