ന്യൂഡൽഹിയിൽ പകുതിയലധികം കുടുംബങ്ങളിലും കോവിഡിനു സമാനമായ വൈറൽ രോഗലക്ഷണങ്ങൾ ഉള്ളതായി സർവേ റിപ്പോർട്ട്. 54 ശതമാനം കുടുംബങ്ങളിലെയും ഒന്നോ രണ്ടോ അംഗങ്ങൾക്കെങ്കിലും പനി അല്ലെങ്കിൽ വൈറൽ പനിയുടെ ലക്ഷണങ്ങൾ കാണിക്കുന്നതായി ലോക്കൽ സർക്കിൾസ് സർവേ ചൂണ്ടിക്കാട്ടി. 50 വയസ്സിനു മുകളിലുള്ളവരെയും കൊച്ചുകുട്ടികളെയുമാണു വൈറസ് പെട്ടെന്നു ബാധിക്കുക. തലവേദന, ചുമ, ക്ഷീണം, മറ്റ് ശ്വസന സംബന്ധമായ പ്രശ്നങ്ങൾ എന്നിവയാണ് രോഗ ലക്ഷണങ്ങൾ. രക്തസമ്മർദ്ദം, പ്രമേഹം, ആസ്മ, സിഒപിഡി, ഹൃദയസംബന്ധമായ പ്രശ്നങ്ങൾ തുടങ്ങിയവ ഉള്ളവരിൽ അസുഖം ബാധിക്കുന്നുണ്ട്. ന്യുമോണിയയും ബ്രോങ്കൈറ്റിസും ഉള്ള രോഗികളുടെ എണ്ണത്തിൽ വർധനവുണ്ടായതായി ആശുപത്രികളും റിപ്പോർട്ട് ചെയ്തു. ഡൽഹി, ഗുരുഗ്രാം, നോയിഡ, ഫരീദാബാദ്, ഗാസിയാബാദ് തുടങ്ങിയയിടങ്ങളിൽ നിന്നുള്ള 13,000 പേരാണ് സർവേയിൽ പങ്കെടുത്തത്. ഇവരിൽ 63 ശതമാനം പുരുഷന്മാരും 37 ശതമാനം സ്ത്രീകളുമാണ് സർവേയിൽ പങ്കെടുത്തത്.
