ഗര്‍ഭനിരോധന ഗുളികകളുടെ ഉപയോഗം മൂഡ് സ്വിങ്സിനും വിഷാദരോഗത്തിനും കാരണമാകുമെന്നും ധാരണശേഷിയെയും ബാധിക്കാമെന്നും പഠന റിപ്പോർട്ട്. കാനഡയിലെ വെസ്റ്റേണ്‍ ഒന്റാരിയോ സര്‍വകലാശാലയിലെ ഗവേഷകരാണ്‌ പഠനം നടത്തിയത്‌. ഗവേഷണഫലം ഫ്രോണ്ടിയേഴ്‌സ്‌ ഇന്‍ സൈക്കോളജി ജേണലിലാണ് പ്രസിദ്ധീകരിച്ചത്. 18 മുതൽ 26 വരെ പ്രായമുള്ള ആരോഗ്യവതികളായ 53 സ്‌ത്രീകളിലാണ്‌ പഠനം നടത്തിയത്‌. ഇവർ ഈസ്‌ട്രജനും പ്രൊജെസ്റ്റിനും അടങ്ങിയ ഗര്‍ഭനിരോധന ഗുളികകള്‍ കുറഞ്ഞത്‌ 3 മാസത്തേക്ക്‌ ഉപയോഗിച്ചവരാണ്‌. മരുന്നുകള്‍ കഴിക്കുന്ന സജീവ ഘട്ടത്തിലും മരുന്നുകള്‍ കഴിക്കാതിരിക്കുന്ന ഘട്ടത്തിലും ഇവരുടെ മാനസികനില ചില ചോദ്യങ്ങളുടെ അടിസ്ഥാനത്തില്‍ വിലയിരുത്തി. ഇതില്‍ നിന്ന്‌ ഭൂരിപക്ഷം പേരിലും സജീവമല്ലാത്ത ഘട്ടത്തില്‍ വിഷാദം ഉള്‍പ്പെടെയുള്ള നെഗറ്റീവ്‌ മൂഡ് ഉണ്ടായതായി പഠനത്തിൽ കണ്ടെത്തി. 29 ശതമാനം സ്‌ത്രീകള്‍ക്ക്‌ 2 ഘട്ടത്തിലും വിഷാദരോഗത്തിന്റെ തോന്നലുകളുണ്ടായി. മിതമായ തോതിലുളള വിഷാദരോഗമുള്ളവരുടേതിന്‌ സമാനമായ ഡിപ്രഷന്‍ സ്‌കോറാണ്‌ ഇവര്‍ക്കും ലഭിച്ചത്‌. കൂടുതല്‍ വൈവിധ്യമുള്ള സ്‌ത്രീകളടങ്ങിയ ജനവിഭാഗങ്ങളില്‍ പഠനം നടത്തിയാല്‍ മാത്രമേ ഈ കണ്ടെത്തലുകള്‍ സ്ഥിരീകരിക്കാന്‍ സാധിക്കൂ എന്ന്‌ ഗവേഷണത്തിന്‌ നേതൃത്വം നല്‍കിയ സൈക്കോളജി വിഭാഗം പ്രഫസര്‍ എലിസബത്ത്‌ ഹാംപ്‌സണ്‍ ചൂണ്ടിക്കാട്ടി. പഠനത്തിന്റെ അടിസ്ഥാനത്തില്‍ ഗര്‍ഭനിരോധന ഗുളികകള്‍ ഉപയോഗിക്കുന്ന എല്ലാ സ്‌ത്രീകള്‍ക്കും വിഷാദരോഗം ഉണ്ടാകുമെന്നും അനുമാനിക്കാന്‍ കഴിയില്ല. എന്നാല്‍ ഗുളികയുടെ ഉപയോഗത്തെ തുടര്‍ന്ന്‌ നിരന്തരമായ മൂഡ് മാറ്റങ്ങളും വൈകാരിക പ്രശ്‌നങ്ങളും നേരിടുന്നവര്‍ ഡോക്ടറെ കൺസൾട് ചെയ്യേണ്ടതുണ്ടെന്ന്‌ റിപ്പോര്‍ട്ട്‌ നിർദ്ദേശിച്ചു.
