കയ്യിലെ, കാലിലെ വരണ്ട ചർമം എന്തുകൊണ്ട് ? നിങ്ങളുടെ കയ്യും കാലും ഒന്ന് നോക്കിയേ, ആകെ വരണ്ടിരിക്കുകയാണോ. കയ്യ് കാലുകളിലെ വരണ്ടചർമം പല കാരണങ്ങൾ കൊണ്ടുവരാം. ആവശ്യമായ ഈർപ്പം ഇല്ലാത്തതാണ് വരണ്ട ചർമ്മത്തിന്റെ മൂലകാരണം. ശരീരത്തിലെ സ്വാഭാവിക എണ്ണകൾക്ക് ചര്മത്തിന്റെ മുകളിലെ പാളിയിൽ ആവശ്യത്തിന് ഈർപ്പം നിലനിർത്താൻ കഴിയാതെ വരുമ്പോൾ ചർമ്മം വരണ്ടതാകുന്നു. വർഷത്തിലെ ചില മാസങ്ങളിൽ മാത്രം ചർമം വരണ്ടതാകുന്നതായി ചിലകർക്ക് അനുഭവപ്പെട്ടേക്കാം ഇതിനു കാലാവസ്ഥ മാറ്റം ആണ് പ്രധാന കാരണം. ചൂട് കാറ്റ് വീശുന്ന കാലാവസ്ഥയോ ശക്തമായ കാറ്റുള്ള തണുത്ത കാലാവസ്ഥയോ പോലുള്ള ഈർപ്പം ഇല്ലാത്ത കാലാവസ്ഥകൾ വരണ്ട ചർമ്മത്തിന് കാരണമാകുന്നു. പ്രതേകിച്ചു തണുപ്പ് കാലങ്ങളിൽ ശരീരത്തിലെ ഈർപ്പത്തിന്റെ അളവ് കുറയുന്നു. ഇത് മൂലം ശരീര ഭാഗങ്ങൾ വരണ്ടതാകുന്നു. മറ്റു ചിലർക്ക് ചില മരുന്നുകൾ കഴിക്കുമ്പോൾ വരണ്ട ചർമം വരാൻ സാധ്യതയുണ്ട്. ഇത് കഴിക്കുന്ന മരുന്ന് അല്ലെർജിക് ആകുന്നതുകൊണ്ടും സംഭവിക്കാം. പ്രായം വരണ്ട ചർമം ഉണ്ടാകുന്നതിൽ വലിയൊരു ഘടകമാണ്. പ്രായം കൂടുന്തോറും ചർമ്മത്തിലെ ഈർപ്പം ഉൽപ്പാദിപ്പിക്കുന്ന എണ്ണ ഗ്രന്ഥികൾ വരണ്ടുപോകുന്നു. ഇത് നിങ്ങളുടെ ചർമ്മത്തെ വരണ്ടതാക്കും. ശരീരത്തിൻ്റെ പ്രായമാകൽ പ്രക്രിയയുടെ സ്വാഭാവിക ഭാഗമാണ് കയ്യ് കാലുകളിലെ വരണ്ട ചർമം. നിങ്ങൾ ജനിക്കുന്ന സമയത്ത് ജീനുകളോടൊപ്പമോ അല്ലെങ്കിൽ വരണ്ട ചർമ്മത്തിന് കാരണമാകുന്ന ഒരു ആരോഗ്യാവസ്ഥയോ ഉണ്ടെങ്കിൽ നിങ്ങൾക്ക് വരണ്ട ചർമ്മം ലഭിക്കാനുള്ള സാധ്യത കൂടുതലാണ്. അലർജി, എക്‌സിമ, പ്രമേഹം, വൃക്കരോഗം എന്നിവ വരണ്ട ചർമ്മത്തിലേക്ക് നയിക്കുന്ന ചില അവസ്ഥകൾ ആണ്. ചിലരുടെ തൊഴിൽ പോലും വരണ്ട ചർമ്മത്തിലേക്ക് നയിച്ചേക്കാം, പ്രത്യേകിച്ചും നിങ്ങൾ രാസവസ്തുക്കൾ ഉപയോഗിച്ച് ജോലി ചെയ്യുകയോ അല്ലെങ്കിൽ ഇടയ്ക്കിടെ കൈ കഴുകുകയോ ചെയ്താൽ. വരണ്ട ചർമ്മം വരാനുള്ള സാധ്യത കൂടും. ഇവയെ കൂടാതെ ഉപാപചയ പ്രവർത്തനങ്ങൾ, ഹോർമോൺ മാറ്റങ്ങൾ എന്നിവയെല്ലാം തന്നെ നിങ്ങളുടെ കയ്യ് കാലുകളിലെ വരണ്ട ചർമത്തിന് കാരണമായേക്കാം.
ചില സന്ദർഭങ്ങളിൽ, മോയ്സ്ചറൈസറുകൾ ഉപയോഗിക്കുകയും, ഭക്ഷണക്രമത്തിൽ, ജീവിതശൈലിയിൽ ഒക്കെ മാറ്റം വരുത്തുകയും ചെയ്യുന്നത് വരണ്ട ചർമ്മത്തെ തടയാൻ സഹായിക്കും. എന്നാൽ നിങ്ങളുടെ കയ്യ് കാലുകളിലെ വരണ്ട ചർമ്മം അടിസ്ഥാനപരമായ ഒരു രോഗാവസ്ഥ മൂലമാണെങ്കിൽ, നിങ്ങൾ ആ അവസ്ഥ തീർച്ചയായും ചികിത്സിക്കേണ്ടതുണ്ട്.
