സാമൂഹികനീതി വകുപ്പും ആരോഗ്യ വകുപ്പും ചേര്‍ന്നൊരുക്കുന്ന ‘മന്ദഹാസം’ പദ്ധതി പുനരാരംഭിച്ചു. ദാരിദ്ര്യ രേഖയ്ക്കു താഴെയുള്ള, 60 വയസ്സിനു മുകളില്‍ പ്രായമുള്ളവര്‍ക്ക് കൃത്രിമ പല്ലു സെറ്റ് സൗജന്യമായി വച്ചുകൊടുക്കുന്ന പദ്ധതിയാണ് ‘മന്ദഹാസം’. ഒന്നോ രണ്ടോ പല്ലുകള്‍ മാത്രം തകരാറുള്ള ആളുകള്‍ക്ക് അപേക്ഷിക്കാനാകില്ല. പൂര്‍ണ പല്ലുസെറ്റാണ് വച്ചുകൊടുക്കുന്നത്. 2016 ല്‍ ആരംഭിച്ച പദ്ധതി കോവിഡ് കാലത്ത് നിര്‍ത്തിവച്ചിരുന്നതാണ് ഇപ്പോള്‍ പുനരാരംഭിച്ചിരിക്കുന്നത്. ഒരാള്‍ക്ക് ലഭിക്കുന്ന സഹായത്തുക പരമാവധി 10,000 രൂപയാണ്. സാമൂഹിക നീതി വകുപ്പിന്റെ സേവനങ്ങള്‍ ലഭ്യമാക്കുന്ന ‘സുനീതി’ പോര്‍ട്ടല്‍ വഴി ആവശ്യക്കാര്‍ക്ക് രജിസ്റ്റര്‍ ചെയ്യാം. കൂടുതല്‍ വിവരങ്ങള്‍ക്ക് https://suneethi.sjd.kerala.gov.in എന്ന വെബ്‌സൈറ്റ് സന്ദര്‍ശിക്കുക.
