മുഖത്ത് എട്ടുകാലി കടിയേറ്റ പ്രശസ്ത ബ്രസീലിയന്‍ ഗായകന് ദാരുണാന്ത്യം. ഡാര്‍ലിന്‍ മൊറൈസ് എന്ന 28-കാരനാണ് മരിച്ചത്. ഡാര്‍ലിന്റെ മുഖത്ത് എട്ടുകാലി കടിച്ചതോടെ ആ ഭാഗത്ത് നിറം മാറുകയും തുടര്‍ന്ന് നീര് വെക്കുകയുമായിരുന്നു. പിന്നീട് വേദന കൂടിയപ്പോള്‍ ആശുപത്രിയില്‍ ചികിത്സതേടിയെന്നും ഡാര്‍ലിന്റെ ഭാര്യ പറഞ്ഞു. ചികിത്സയിലിരിക്കെയാണ് മരണം. ചെറുപ്രായത്തില്‍ തന്നെ പ്രശസ്തിയുടെ കൊടുമുടിയില്‍ നില്‍ക്കുമ്പോഴാണ് താരത്തിന്റെ അകാലവിയോഗം. അതേസമയം ഗായകനെ കടിച്ച എട്ടുകാലി ഏതിനത്തില്‍ പെട്ടതാണെന്നോ, എങ്ങനെയാണ് ഈ പരുക്ക് മരണം വരെയെത്തിയതെന്നോ സംബന്ധിച്ച കൂടുതല്‍ വിവരങ്ങളൊന്നും ലഭ്യമല്ല.
