ഗുരുതരമായി കോവിഡ് ബാധിച്ചവര്‍ കഠിനാധ്വാനം ഒഴിവാക്കണമെന്ന് കേന്ദ്ര ആരോഗ്യമന്ത്രി മന്‍സുഖ് മാണ്ഡവ്യ. ഗുജറാത്തില്‍ ഗര്‍ബ നൃത്തത്തിനിടെ 10 പേര്‍ ഹൃദയാഘാതം മൂലം മരിച്ച സംഭവത്തില്‍ മാധ്യമങ്ങളോട് പ്രതികരിക്കവേയാണ് മന്ത്രി ഇക്കാര്യം വ്യതമാക്കിയത്. കോവിഡ് ഗുരുതരമായി ബാധിച്ച ചരിത്രമുള്ളവര്‍ ഒന്നുരണ്ടു വര്‍ഷത്തേക്ക് കടുത്ത വ്യായാമങ്ങളിലും ശാരീരിക പ്രവര്‍ത്തനങ്ങളിലും ഏര്‍പ്പെടാതിരിക്കണമെന്നും മന്ത്രി വ്യക്തമാക്കി. കോവിഡ്ബാധയും ഹൃദയാഘാതവും തമ്മിലുള്ള ഐ.സി.എം.ആറിന്റെ പഠനം ചൂണ്ടിക്കാട്ടിയായിരുന്നു മന്ത്രിയുടെ പ്രതികരണം. ഗുജറാത്തില്‍ ഗര്‍ബയ്ക്കിടെ ജീവന്‍ നഷ്ടപ്പെട്ടവര്‍ കൗമാരക്കാരും മധ്യവയസ്‌കരുമാണ്. ബറോഡയിലെ ദാഭോയില്‍ നിന്നുള്ള 13 വയസ്സുള്ള ആണ്‍കുട്ടിയാണ് മരിച്ചവരില്‍ ഏറ്റവും പ്രായം കുറഞ്ഞയാള്‍.
