ഡോക്ടര്‍മാരുടെ സ്വകാര്യ പ്രാക്ടിസ് നിയന്ത്രിക്കാന്‍ തീരുമാനിച്ചു സര്‍ക്കാര്‍. ആരോഗ്യ ഡയറക്ടറേറ്റിനു കീഴില്‍ പ്രാഥമികാരോഗ്യ കേന്ദ്രങ്ങള്‍ മുതല്‍ ജില്ലാജനറല്‍ ആശുപത്രികള്‍ വരെയുള്ള ഡോക്ടര്‍മാര്‍ക്കാണ് നിയന്ത്രണം. ഇതിനായി നിലവിലെ നിയമം കര്‍ശനമാക്കും. മന്ത്രി വീണാ ജോര്‍ജിന്റെ സാന്നിധ്യത്തില്‍ കഴിഞ്ഞദിവസം നടന്ന യോഗം ഇക്കാര്യം ചര്‍ച്ച ചെയ്തു. ഡ്യൂട്ടി സമയം കഴിയാതെയും അവധിയെടുത്തുമുള്ള സ്വകാര്യ പ്രാക്ടിസ് തടയുക, ആശുപത്രിക്കു മുന്നില്‍ കെട്ടിടം വാടകയ്‌ക്കെടുത്തുള്ള സ്വകാര്യ പ്രാക്ടിസ് വിലക്കുക, ഒരു ആശുപത്രിയില്‍ ജോലി ചെയ്യവെ മുന്‍പു ജോലി ചെയ്തിരുന്ന ആശുപത്രിക്കടുത്ത് സ്വകാര്യ പ്രാക്ടിസ് തുടരുന്നതു തടയുക, സര്‍ജറി ഡോക്ടര്‍മാര്‍ക്കു പ്രത്യേക മാനദണ്ഡം നിശ്ചയിക്കുക എന്നിവയാണ് ഏര്‍പ്പെടുത്തിയിരിക്കുന്ന നിയന്ത്രണങ്ങള്‍. സ്വകാര്യ പ്രാക്ടിസിനു വിലക്കുള്ള മെഡിക്കല്‍ കോളജ് ആശുപത്രികളിലെ ഡോക്ടര്‍മാര്‍ക്ക് ശമ്പളത്തിന്റെ 20% തുക നോണ്‍ പ്രാക്ടിസിങ് അലവന്‍സുണ്ട്. ആരോഗ്യ ഡയറക്ടറേറ്റിനു കീഴിലെ നാലായിരത്തിലധികം ഡോക്ടര്‍മാര്‍ക്കുകൂടി ഈ അലവന്‍സ് നല്‍കുന്നത് സര്‍ക്കാരിനു വലിയ ബാധ്യതയാകുമെന്ന വിലയിരുത്തലുമുണ്ട്.
