ശബരിമല: ശബരിമല കയറാന്‍ തൃപ്തിദേശായി വേഷംമാറി എത്തിയേക്കുമെന്ന് രഹസ്യാന്വേഷണ റിപ്പോര്‍ട്ട്. ജനുവരിയില്‍ ശബരിമലയില്‍ പ്രവേശിക്കുമെന്ന് തൃപ്തി ദേശായി പ്രഖ്യാപിച്ചതിനു പിന്നാലെയാണ് വേഷം മാറി തൃപ്തി ശബരിമലയില്‍ പ്രവേശനം നടത്തിയേക്കുമെന്ന രഹസ്യ റിപ്പോര്‍ട്ടുകള്‍ പുറത്തുവന്നിരിക്കുന്നത്. മകരവിളക്കിനോട് അനുബന്ധിച്ചുണ്ടാവുന്ന തിരക്കില്‍ തൃപ്തി സന്നിധാനത്ത് പ്രവേശിച്ചേക്കുമെന്നാണ് റിപ്പോര്‍ട്ട്.
അതേസമയം റിപ്പോര്‍ട്ടുകളെ തുടര്‍ന്ന് ശബരിമലയില്‍ പഴുതടച്ച സുരക്ഷാപരിശോധന ശക്തമാക്കിയിട്ടുണ്ട്. എല്ലാ ഭക്തരേയും കര്‍ശന പരിശോധനയ്ക്കു ശേഷമാണ് സന്നിധാനത്തേക്ക് കടത്തിവിട്ടുകൊണ്ടിരിക്കുന്നത്. ഇതിനു പുറമേ കാനന പാതയിലും പുല്‍മേട്ടിലും പരിശോധന കര്‍ശനമാക്കിയിട്ടുണ്ട്.
എന്നാല്‍ കര്‍ശന പരിശോധന നടത്താന്‍ പമ്പയിലും പരിസരങ്ങളിലും ആവശ്യത്തിന് വനിതാ പൊലീസിനെ വിന്യസിക്കാത്തതും ഉദ്യോഗസ്ഥരില്‍ ആശങ്ക പരത്തുന്നുണ്ട്. ഇതിനിടെ, തൃപ്തി ഇപ്പോള്‍ പൂനെയിലാണ് ഉള്ളതെന്ന റിപ്പോര്‍ട്ടുകള്‍ പുറത്തു വരുന്നുണ്ട്.
ശബരിമല പ്രവേശനവുമായി ബന്ധപ്പെട്ട് തന്റെ ജീവന് ഭീഷണി ഉണ്ടെങ്കിലും ലക്ഷ്യത്തില്‍ നിന്നും പിന്നോട്ടില്ലെന്ന് തൃപ്തി വ്യക്തമാക്കിയിരുന്നു.
സ്ത്രീകള്‍ക്ക് പ്രവേശനമില്ലാത്ത മഹാരാഷ്ട്രയിലെ ശനിശിംഘ്നാപൂര്‍ ക്ഷേത്രത്തില്‍ പ്രവേശിച്ചുകൊണ്ടാണ് തൃപ്തി വാര്‍ത്തകളില്‍ ഇടം നേടിയത്.
