കാന്‍സറിനെതിരെയുള്ള ആധുനിക ചികില്‍സയായ കാര്‍-ടി സെല്‍ തെറാപ്പിയുമായി ബന്ധപ്പെട്ട് എറണാകുളം മെഡിക്കല്‍ ട്രസ്റ്റ് ഹോസ്പിറ്റല്‍ മെഡിക്കല്‍ ഓങ്കോളജി ആന്റ് ക്ലിനിക്കല്‍ ഹെമറ്റോളജി ഡിപ്പാര്‍ട്ട്‌മെന്റിന്റെ നേതൃത്വത്തില്‍ ഏപ്രില്‍ 6ന് ”ക്യുറാ ഇമ്മ്യൂണിസ്” കാര്‍-ടി സെല്‍ തെറാപ്പി നാഷണല്‍ കോണ്‍ക്ലേവ് സംഘടിപ്പിക്കും. എറണാകുളം ക്രൗണ്‍ പ്ലാസയില്‍ നടക്കുന്ന കോണ്‍ക്ലേവ് ഉച്ചയ്ക്ക് 12-ന് വിഴിഞ്ഞം തുറമുഖം മാനേജിംഗ് ഡയറക്ടര്‍ ഡോ. ദിവ്യാ എസ്. അയ്യര്‍ ഐ.എ.എസ് ഉദ്ഘാടനം നിർവഹിക്കും. മെഡിക്കല്‍ ട്രസ്റ്റ് ഹോസ്പിറ്റലില്‍ ആരംഭിക്കുന്ന പുതിയ ബോണ്‍മാരോ ട്രാന്‍സ്പ്ലാന്റ് ആന്റ് കാര്‍-ടി സെല്‍ തെറാപ്പി യൂണിറ്റിന്റെ ഉദ്ഘാടനവും കോണ്‍ക്ലേവില്‍ നടക്കുന്നതാണ്. കാന്‍സറിനെതിരെയുള്ള ചികില്‍സയില്‍ പ്രതികരണം ഉണ്ടാകാത്തവര്‍ക്കും കാന്‍സര്‍ തിരിച്ചു വരുന്ന വ്യക്തികള്‍ക്കും ഏറ്റവും ഫലപ്രദമായ ചികില്‍സയാണ് കാര്‍-ടി സെല്‍ തെറാപ്പി. ലുക്കീമിയ, ലിംഫോമ, മൈലോമ തുടങ്ങിയ രക്താര്‍ബുദങ്ങള്‍ക്കാണ് ഇപ്പോള്‍ ഈ ചികില്‍സ ഏറ്റവും ഫലപ്രദമെന്ന് വിദഗ്ധർ കണ്ടെത്തിയിരിക്കുന്നത്. അടുത്ത ആറോ ഏഴോ വര്‍ഷത്തിനുള്ളില്‍ എല്ലാ തരത്തിലുമുള്ള കാന്‍സറിനും കാര്‍-ടി സെല്‍ തെറാപ്പി ഫലപ്രദമാകുന്ന വിധത്തിലുളള കണ്ടെത്തലുകള്‍ ഉണ്ടാകുമെന്നാണ് വിശ്വസിക്കുന്നതെന്നും വിദഗ്ധർ ചൂണ്ടിക്കാട്ടി. 45 ദിവസം കൊണ്ട് കാര്‍-ടി സെല്‍ തെറാപ്പി ഉപയോഗിച്ചുള്ള ചികില്‍സ പൂര്‍ത്തിയാകുന്നതാണ്. തുടര്‍ച്ചയായയുള്ള ആശുപത്രി വാസം 10 ദിവസത്തില്‍ താഴെ മതിയാകും. ഏപ്രില്‍ 6ന് രാവിലെ 9 മണി മുതല്‍ വിവിധ വിഷയങ്ങളില്‍ സെമിനാറുകളും പാനല്‍ ചര്‍ച്ചകളുമായി ആരംഭിക്കുന്ന കോണ്‍ക്ലേവില്‍ കാന്‍സര്‍ രോഗവിദഗ്ധർ വിവിധ വിഷയങ്ങളില്‍ പ്രഭാഷണം നടത്തും. വൈകുന്നേരം 5ന് നടക്കുന്ന പാനല്‍ ചര്‍ച്ചയോടെ കോണ്‍ക്ലേവ് അവസാനിക്കുമെന്നും സംഘാടകര്‍ ചൂണ്ടിക്കാട്ടി.
