പാലക്കാട് പിരായിരി പ്രാഥമികാരോഗ്യ കേന്ദ്രത്തിൽ അഞ്ചുദിവസം പ്രായമായ കുഞ്ഞിന് വാക്സിൻ മാറി കുത്തിവെച്ചതായി പരാതി. ബിസിജി കുത്തിവെപ്പിന് പകരം പോളിയോ വാക്സിനാണ് കുഞ്ഞിന് നൽകിയത്. കുട്ടി പാലക്കാട് ജില്ലാ ആശുപത്രിയിൽ നിരീക്ഷണത്തിൽ തുടരുകയാണ്. പള്ളിക്കുളം സ്വദേശികളായ ദമ്പതിമാരുടെ കുട്ടിക്കാണ് വാക്സിൻ മാറി കുത്തിവെച്ചത്. ആരോഗ്യ പ്രവർത്തകരുടെ അനാസ്ഥയ്ക്കെതിരെ ഡിഎംഒക്ക് പരാതി നൽകുമെന്ന് ബന്ധുക്കൾ പറഞ്ഞു. നിലവിൽ കുഞ്ഞിന് മറ്റു ആരോഗ്യപ്രശ്നങ്ങളൊന്നുമില്ല.
