ന്യൂഡല്‍ഹി: അപകടത്തില്‍പ്പെട്ട മാദ്ധ്യമപ്രവര്‍ത്തകനെ ആശുപത്രിയിലെത്തിച്ച കോണ്‍ഗ്രസ് അദ്ധ്യക്ഷന്‍ രാഹുല്‍ഗാന്ധിക്ക് സോഷ്യല്‍ മീഡിയയുടെ കൈയ്യടി. ഇന്നലെ ഉച്ചയോടെയാണ് സംഭവം. റോഡ് മുറിച്ചുകടക്കുന്നതിനിടെ ഡല്‍ഹി ഹുമയൂണ്‍ റോഡില്‍വച്ച് വാഹനമിടിച്ച് പരിക്കേറ്റ രാജസ്ഥാനില്‍നിന്നുള്ള മാദ്ധ്യമപ്രവര്‍ത്തകന്‍ രാജേന്ദ്രവ്യാസിനാണ് രാഹുലിന്റെ കൈസഹായമുണ്ടായത്. അതുവഴിവന്ന രാഹുല്‍ വാഹനം നിറുത്തിയിറങ്ങി. സുരക്ഷാ ഉദ്യോഗസ്ഥരുടെ സഹായത്തോടെ രാജേന്ദ്രവ്യാസിനെ സ്വന്തംവാഹനത്തില്‍ കയറ്റി ഡല്‍ഹി എയിംസ് ആശുപത്രിയിലെത്തിക്കുകയായിരുന്നു. വ്യാസിനെ ശുശ്രൂഷിക്കുന്ന രാഹുലിന്റെ വീഡിയോയും പുറത്തുവന്നിട്ടുണ്ട്. പരിക്ക് ഗുരുതരമല്ല.
