ന്യൂഡിൽസ് കഴിച്ചതിനെത്തുടർന്ന് ഏഴ് വയസുകാരൻ മരിച്ചു. ഇൻസ്റ്റന്റ് നൂഡിൽസ് കഴിച്ചതിനെത്തുടർന്നുണ്ടായ ഭക്ഷ്യവിഷബാധ മൂലമാണ് മരണമെന്നാണ് പ്രാഥമിക റിപ്പോർട്ട്. കുട്ടിയെക്കൂടാതെ ആറ് കുടുംബാംഗങ്ങൾ ആശുപത്രിയിൽ ചികിത്സയിലാണ്. ഉത്തർപ്രദേശിലെ പിലിഭിത്തിലാണ് സംഭവം. ഡെറാഡൂൺ സ്വദേശിയായ രാഹുൽ കുമാർ ആണ് മരണപ്പെട്ടത്.
ഉച്ചഭക്ഷണമായി നൂഡിൽസ് കഴിച്ചതിന്റെ അടുത്ത ദിവസം എല്ലാവർക്കും കഠിനമായ വയറുവേദനയും അതിസാരവും അനുഭവപ്പെടുകയും ആരോഗ്യനില വഷളായതോടെ ആശുപത്രിയിൽ ചികിത്സ തേടുകയുമായിരുന്നു. എന്നാൽ രാഹുലിന്റെ ജീവൻ രക്ഷിക്കാനായില്ല. സീമയും സന്ധ്യയും വിവേകും സീമയുടെ മൂന്നു സഹോദരങ്ങളും ഇപ്പോഴും ആശുപത്രിയിൽ ചികിത്സയിലാണ്. വിവേക് എന്ന ആളുടെ നില വളരെ ഗുരുതരമാണ്. റായ്ബറേലി ജില്ലാ ആശുപത്രിയിലും പിലിഭിത്തിലെ സാമൂഹിക ചികിത്സാ കേന്ദ്രത്തിലുമാണ് ഇവർ ചികിത്സയിലുള്ളത്. വിവേക് ഒഴികെയുള്ളവരുടെ ആരോഗ്യനില തൃപ്തികരമാണെന്ന് സാമൂഹിക ചികിത്സാ കേന്ദ്രത്തിലെ അധികൃതർ പറഞ്ഞതായി ഒരു സ്വകാര്യ മാധ്യമം റിപ്പോർട്ട് ചെയ്തു.
